Sulinerit pillugit kisitsisitigut paasissutissani najoqqutat
Sulinerit pillugit kisitsisitigut paasissutissanut suliffeqarfiit Akileraartarnermut Pisortaqarfimmut qaammammut nalunaarutigisartagaat aamma qaammammut erseqqissaassutigisartagaat sukumiisut tunngaviunerpaajupput. Qaammammut nassuiaatini sukumiisuni nalunaartutigineqartarput suliffeqarfiit ataasiakkaarlutik qaammammut aningaasarsissutigitittagaat, soorlu makku; akileraarutit aamma sulisoqarnermut akitsuutit. Aningaasarsiat akileraarutillu suliffeqarfinnit sulisunut ataasiakkaanut qaammammut erseqqissaanerni sukumiisuni immikkoortiterneqartarput. Qaammammut nassuiaatit sukumiisut suliffeqarfinnut tunngasunik paasissutissanik imaqartut qaammammut erseqqissaanerit sukumiisut inunnut tunngasunik paasissutissanik imaqarput. Qaammammut nassuiaat sukumiisoq aamma qaammammut erseqqissaat sukumiisoq imminnut qanittuararsuarnik paasissutissaqarput.
Qaammammut nassuiaat sukumiisumi, sulisut aningaasarsiaasa annertussusaat suliffeqarfimmi aningaasarsianut atukkat annertoqatigisussaavaat. Nalunaarsukkani amerlanerpaanni tamanna eqquuttarpoq, kisianni suliffeqarfiit ilaanni sulisut aningaasarsiaat suliffeqarfiit aningasarsianut atugaannit anginerusarput. Taamaattoqartillugu suliffeqarfiit aningaasarsianut atortagaasa ilaat (imaluunniit tamakkerlugit) sulisut aningaasarsiaanut sanilliunneqarsinnaaneq ajorput.
Suliffeqarfiit, pisortaqarfiit assigisaasalu Danmarkimeersut aningaasarsianit A-mik akileraarutip annertussusaa aamma A-mik akileraarutit annertussusaat Danmarkimi akileraartarnermut pisortanut eIndkomst aqqutigalugu nalunaarutigisartussaavaat. Suliffeqarfiit pineqartut A-mik akileraarutaasa qaammatikkaartumik katinneri Naatsorsueqqissaartarfiup Akileraartarnermut pisortaqarfiup immikkoortortaqarfianit Danmarkimiittumit pisarpai, paasissutissat pineqartartut tassaapput qaammammut nassuiaatit sukumiisut qaammammut erseqqissaanerit sukumiitsut taakkununnga ilanngunneqarneq ajorput.
Sulisitsisut sulisullu suliaqarfinni sorlerni inissisimanerat paasiniarlugu Inuussutissarsiummik Ingerlataqartunik Nalunaarsuiffik (IIN) atorneqartarpoq. Sulineq pillugu nalunaarsukkat IIN-imi suliaqarfiit immikkoortitersimaneri assigalugit immikkoortitigaapput, sulisitsisut IIN-i malillugu immikkoortitersimapput. Kisitsisaataasivimmi aamma ukiumoortumik sulinerit pillugit kisitsisigut paasissutissani suliaqarfinnut assigiinngitsunut marlunnut immikkoortinneqarsimapput. Nuna tamakkerlugu naatsorsuutini immikkoortiterineq malillugu siulleq immikkoortitigaavoq, tassani suliaqarfinnut assigiinngitsunut 30-nut immikkoortitsisoqarpoq, immikoortiterinerup aappaani suliaqarfiit arfineq marluk immikkoortiteriffigineqarlutik, tassani IIN malillugu immikkoortiterisoqanngilaq.
Najugaqavissut Naatsorsueqqissaartarfimmi innuttaasunik allattuiffik malillugu aaliangerneqartarput. Innuttaasuni allattuiffik atorlugu assersuutigalugu najugaqarfinnut, ukioqqortussutsinut aamma suiaassutsinut paasissutissat, sulinermut ilanngunneqartarput.
Pisortaqarfinni sulinernut tunngatillugu kommunit isumaginninnermut tunniuttagaanut Naatsorsueqqissaartarfimmi nalunaarsuiffik najoqqutarilluarneqarpoq. Qaammammut sukumiisumik erseqqissaanerni kommunini sulinernit akiliutigineqarsimasut ersersinneqartarput akiliutigineqarsimasullu sulisimanermut attuummassuteqanngitsut soorlu utoqqalinersiat aamma suliffeqanngikkallarnermi ikiorsiissutit nalunaarsuiffik atorlugu immikkoortinneqarsinnaapput.